Árqaısysy bir tarıh, san alýan taǵdyr. Kórmeni oblystyq kórkemsýret mýzeıi, oblystyq memlekettik muraǵat, P.Vasılev atyndaǵy mýzeı-úıi, G.Potanın atyndaǵy oblystyq tarıhı ólketaný mýzeıi uıymdastyrǵan.
Mýzeı qyzmetkerleriniń aıtýynsha, repressııa jyldarynda oblysymyzǵa 61 ulttyń ókilderinen turatyn 42 myń adam qonys aýdarylypty. Olardyń ishinde sheshender, ıngýshter, balqarlar, latysh, eston, grek, parsy ulttarynyń ókilderi boldy. Qazaqtyń ulylyǵy men darhandyǵy arqasynda qýǵynǵa ushyraǵan ózge halyq jerimizde turaqtap qaldy. Mysaly, oblysqa ataqty ǵalym-saıahatshy, Arktıka zertteýshisi Gernet Evgenıı, daryndy ınjener, keńes saýda flotynyń bastaýynda turǵan Iýlıı Venske jáne basqa da repressııaǵa ushyraǵan azamattar qonys aýdaryldy. Osy jerde jerlendi. Urpaqtary bizben birge osy jerde turyp jatyr. Zobalań tusyndaǵy qyrǵynda óńirimizdiń 6 myńǵa jýyq adamy stalındik repressııanyń jazyqsyz qurbany boldy.
Sarǵaıǵan sýretterdiń kómeski izderi Júsipbek Aımaýytov, Pavel Vasılev, Aryn Súleımenov, Ermuhan Bekmahanov, Qabysh Berdalın, Jumaseıit Shanın, Zeıin Shashkındeı uly tulǵalardy eske salady. Ashtyqtan qyrylǵandardyń sanyn esepteý múmkin emes. Mýzeı ókilderi oblysta asharshylyq qurbandary jerlengen 37 zırat bar ekenin anyqtapty.
Al «Eshqashan umytylmas» taqyrybyndaǵy 31 mamyr – qýǵyn-súrgin qurbandaryn eske alý kórmesine kezinde Qazaqstanǵa jer aýdarylǵan sýretshiler Abram Cherkasskıı, Lenonıd Brıýmmer, Elızaveta Govorova, Isaak Itkınd, Vladımır Eıfert terdiń sýretteri qoıylǵan. Kórme 20 maýsymǵa deıin jalǵasady. Mýzeı qorynda jalpy saıası qýǵyn-súrginge ushyraǵan sýretshilerdiń 214 shyǵarmasy saqtaýly tur.
Farıda Byqaı, «Egemen Qazaqstan»
Pavlodar